其實我都係萌馬尾的...
4.8.08
3.8.08
The Dark Knight
「The Dark Knight 蝙蝠俠：黑夜之神」年份 : 2008 美國
導演 : Christopher Nolan
演員 : Christian Bale, Heath Ledger, Aaron Eckhart
「Why so serious?」
http://hk.youtube.com:80/watch?v=phTqQebUcPY&NR=1
http://uk.youtube.com/watch?v=w2yv8aT0UFc
因為唔認真，呢個世界係無人會理．
我地可以做唔認真既事，但係唔可以唔認真咁去做．
就連Joker本身都對chaos呢個situation超認真同偏執，凡事計到盡，只係佢要既野同一般人唔同．
再講，如果Heath唔係認真到呢個地步，就算係讚，又會唔會好似依家咁讚到天上有，地下無？
不過，確實係已經天上有，地下無了．
如果Christopher Nolan識我既話，我希望同佢講聲對唔住．當我見到另一個神既時候，真係笑左出黎，呢個唔應該係笑位．
but, why so serious sin?
2.8.08
Batman Begins
「Batman Begins 蝙蝠俠：俠影之迷」年份 : 2005 美國
導演 : Christopher Nolan
演員 : Christian Bale, Michael Caine, Katie Holmes, Gary Oldman, Morgan Freeman
睇第二集之前，都係要睇第一集先．．．
唉，好想出番聽睇．．．
31.7.08
兄弟
終於去左搵呢兩兄弟．
兩歲既魚旦已經識講野，仲識教我彈佢個結他仔．三個月大既魚旦仔就好似以前既魚旦，個樣其實真係無分別．
好耐之前睇中果個比小朋友彈既鋼琴，竟然已經無得賣，咁樣唯有再搵過，差住先啦，唔會走左你地既．
好耐無同何太一齊食飯，可能已為人母兩年既關係，佢d語氣越黎越似我阿媽，睇黎何生都比佢恰得好利害．唯一唔同既係，何太好多時都會叫工人做野，我阿媽就會自己走左去做．所以我都唔係好習慣食飯既時候，有人會一個人在廚房自己食．與其話我唔習慣，不如話我唔中意，就算係工人，我都唔明點解要咁做．
我識何生既時候係小學六年級，果時何太仲未係何太，只係我家姐．果時大家都好多黑頭，好鬼青春．但係果日我望住何生個頭，白左好多，自己近黎既白頭髮又多到唔知邊度走出黎．望住兩個細路，真係歲月摧人老．
近來想上戲院睇Batman，但係又未睇第一集，老細就借左第一集既Blu-ray比我，咁我唯有帶埋上何生屋企睇．Blu-ray真係清，只係播左第二集條Imax版trailer已經嚇到魚旦傻左唔出聲，當然，佢只係比d小丑既面具嚇親．問佢係唔係驚，佢又拎住頭答我一個驚字．結果睇完條trailer就收工，費事佢地訓唔著．
過左陣就代何太講睡前小故事比魚旦聽，本故事書個名叫「小英雄拉比」．拉比係一隻小刺蝟，佢細個既時候比松鼠爸爸同松鼠媽媽以為係一個大果實，就咁拎左番屋企養．拉比大左d既時候，就開始唔中意自己身上既刺，因為佢經常唔小心吉傷人同整爛d野．使唔使咁深呀，不過又好好睇．講到一半，魚旦開始講返個故仔比我聽，原來佢已經聽左好多次．咁問佢鍾唔鍾意聽，佢竟然答媽媽鍾意講，要問多佢一次，佢先答鐘意．最後小拉比利用身上既刺打敗左大野狼，成為小草原入面既英雄．
走果時問魚旦記唔記得我教佢做咩，佢大大聲話記得．
「咁係咩呀？」
「唔好叫工人姐姐做野．」
「咁邊個做呀？」
「媽媽．」
「！！！」
我叫你自己學做，你又屈我叫媽媽做，攪到我比何太話．睇你咁細個就識兜圈答問題，大個都應該係大把時間自尋煩惱多架啦．
30.7.08
27.7.08
24.7.08
咩世界
如果嘉士伯可能係世界上最好既啤酒，咁娛樂新聞，就應該係世界上最鳩既新聞．
http://hk.youtube.com/watch?v=pGVf4gUujms
http://hk.youtube.com/watch?v=l5Jk7f6FNzI
好在唔係竇唯，唔係燒你全家都似．
不過都係依家先發覺，點解無人搵鵬鵬做小龍？
咪又係姓李．
我讀得書少，你唔好影我．
23.7.08
回憶在夜空的紅
一場兄弟．
果晚阿恆生日，明知會死都要到一到．
我覺得，唔可以再講「到倒就到」之類既說話．
其實只係到左一陣，就飲左三杯Hoogarden，好耐未試過咁短既時間飲咁多．雖然只係啤酒，不過都足以wing死依家既我．
但係，好死痛快．
然後，一個人番公司繼續做野．
零晨12點既星期日，即係星期一既開始．
都係煲煙．
因為煲零晨煙，同左幾個看更叔叔熟左．雖然大家都唔知大家叫咩名，但係有時佢地見我出去，都會一齊．
呢排見得最多就係佢地．
可能其實我心裡面好想做看更，出左黎做野之後，無啦啦都會同d看更熟起上黎．我仲好懷念會識用dslr既阿黃，由鄉下拎左番薯比我送飯既高公子，同埋一見面就會握手，口含紅萬既Simon兄．
果晚個天好紅．
而且有少少風．
我聽住ipod堡煙，播緊既係克勤既一場兄弟．
一個看更走出黎，問我信唔信好快就會落雨．
我話，一定啦，個天咁紅．
原來唔一定．
看更大叔話要有埋少少風，先多數落得成雨．
點解既？我問．
晚晚望住個天，望左十幾年，點會唔知．
聽到佢咁答，我突然唔知講咩好．
我諗起我阿婆．
佢在生既時候，每次番風落雨前一兩日，都會風濕痛得好勁．但係佢會好自豪咁講，痛左廿幾年，點會唔準，準過天文台．
紅色既夜空，正確黎講，係暗啞既橙紅色．
幾滴雨水，開始滴落無人既馬路上面．
係勁喎．
因為密雲先會反映出街上面既街燈同樓既燈，我地先會睇到紅色．而有風代表氣壓比較低，所以多數落得成啦．
真係架？我問．
我估下既姐．看更笑住答．
不過我信．
你望左十幾年，我邊有得唔信．
看更番左入去巡樓．
我想，食多一支．
繼續，一場兄弟．
日落從沒有褪色 公園夕陽瀉地
年輕相約 玩耍總有你
瀾漫時日已結束 朋友為名利變
漸行漸遠 太多公事 聚太少
人各有不同利益 一句義氣險如薄冰
今天相見要很高興 怕何時變得絕情
朋友似不曾認識 欺騙過我的曾經真誠
落泊裡一起酒醉 互相打氣
步向光榮 只好 一個盡興
只好一個盡興
22.7.08
15.7.08
6.7.08
屎唔臭都食
大家近來都說起銅臭．
升職加薪，滿身銅臭．
看來大家都誤解了，我們有資格被說是滿身銅臭的人嗎？
在我看來，至少，在我身邊一個也沒有．
別太過自大．
哪有資格．
古代以銅鑄幣，演變到今天的金錢社會，只是無銀用．
喂！我們一直都無銀用，一出生已經無銀用．
為什麼會這樣的呢？
就是因為那些滿身銅臭的人做成．
那，誰？
別理，總不是我和你．
未投身社會前，我不知道那些每天朝九晚五，獲得高薪厚職的人，腦袋是不是一個錢袋．那種喪屍般的生活，怎樣過．
看，這就是幼稚．
創作性行業，說起來好聽．導演，設計師，編劇，作曲家，電腦繪圖員，一個個還不是喪屍？
工作時薪不合比例的喪屍．
我錯，不是喪屍，是狗．
Create like a God, work like a dog.
「好一班狗奴才！」
「皇上息怒，臣罪該萬死．」
哪個行業不是這樣？
誰是被欺壓的一群，誰是玩弄金錢權力的一群．
銅你個臭X！
我覺得這句粗口也不錯，對那些真正滿身銅臭的人說．
經歷過長期負債，經歷過親戚欠債被找上門，經歷過八元三塊養家，經歷過兩星期每天只吃一餐，那會滿身銅臭．
往錢看，眼就亮．
我一直喜歡某本漫畫中的這句對白，坦白．
你會這樣說嗎？
假設，兩個為了地上一元而大打出手的埃塞俄比亞兒童，滿身銅臭．
不成立．
他們已經是「屎唔臭都食」的狀態了．
在網路看過一篇報導，以「新農村運動」聞名的經濟學家林毅夫重提「窮人經濟學」．
「我國當前貧富差距的主要矛盾不在於富人太富，而在於窮人太窮．」
銅你個臭X！
單看這句的時候，真想打電話給他的媽媽．
但細心看下去，確實又是這樣．
不記得在那裡聽過，人實在不能太窮，否則很多事也做不到．
多少赤子，勤奮工作，努力向上，試圖改變這個不公的世界．
最後，還不是慢慢被這個世界改變了．
要怪，只可以怪這個世界其實太過公平，一出生，就知道你有無銀用，有沒有銅臭味．
5.7.08
.jpg)
28.6.08
Plasma
Panasonic TH-42PY800H Plasma 等離子電視
姐結婚當年前，不明所以地提議家中來一個大裝修，那時我不明白．又不是有錢人，一直住得舒舒服服，裝什麼修？
我是投出反對票的一個，吵了一場架，結果二比一比一，老爺子沒好氣，投棄權票．最後少數要服從多數，但口服心不服．
裝了修，超了資，不明所以地成了債下囚．
討厭欠債，更討厭不明所以地欠債，最討厭無錢又不明所以地裝修而欠債．
直到姐出嫁那天，我才明白為了什麼裝修．
怕寒酸嗎？
我們一直都是一起在這殘舊的公共屋村長大的，不是嗎？
我們的朋友不是一早都知道的嗎？
他們不是一早就來過的嗎？
這個情緒，只是出現了一會兒．
早忘記了．
直到那天我在影音店看見這部Plasma，又想起了一點．
打從第一眼開始，我就看不順眼姐送來的那部JNC的LCD TV．
別看不起人啊！你只是一部LCD TV而已！
兩老雖然不明白，但一開始也說你好像很濛啊！
我們家是看National大的，就好像sponsor一樣．
我一出生看的，就是National的17吋CRT TV，就是那些調教頻道要人手轉來轉去，又經常走台那種．夏天要用風筒吹著它的背部為它驅風除濕，有時又跪又拜才有一個正常的彩色畫面．當然，大家也會有發脾氣的時候，動手動腳，拍拍打打少不了．片頭打架片尾和，看不了片頭，至少總會看到明珠930的結局．
大爺一樣，人性化得很．
就這樣一起生活了十多年．不記得中學那一年，回家後突然發覺他沒有呼吸．和老爸一起抬他到二手急救中心，最後他還是壽終正寢，返魂無術．
不記得過了多少個沒有電視的日子，看著那大塊頭原本的位置，變得空空如也，心裡就更加想看明珠930．
應該過了好幾個星期，家裡總算有點餘錢，可以買電視機了．
第二部電視機，就是Panasonic的畫王系列，25吋的CRT TV．那時Panasonic的畫王和Toshiba的火箭炮鬥得難分難解，眼看隔壁GER文部火箭炮日日爆得鏗鏘有力，我就不信Panasonic的畫王會比它差．而且，畫王那個一按下去會慢慢彈出來的控制台實在有型得多．
結果是，滿意，十分滿意．
直至這部臭LCD TV進駐我家，我也沒有對它投訴過．
媽說要把送給窮人，我說我就是那個窮人，可以送給我，放在我的板間房．
小孩子鬧脾氣，可我沒有說謊．我連讓它容身的地方也沒有，要不我每天就抱著它去睡．
JNC的26吋LCD TV，我想把它換掉很久，它是我們家的第三部電視．
我對它沒有任何感情，或許是人大了，難以付出，或許我沒有時間放在它身上，或許是因為，它不是我所選擇的．
當然，我也有努力過令自己多喜歡它一點，可惜它的DVI接口連HDMI轉換插也使用不了，結果只可以色差輸入．辛苦了自己好幾個晚上，我沒法說些什麼．
可以的話，我想把家中變回從前一樣．雖然從前的裝修是怎樣，我已經忘記了．但至少，讓我把電視機變回Panasonic這個品牌．
那天，我在泰林看電視看了半小時．我在看電視，不是看電視機．我又開始懷疑，雖然我已找到我所喜歡的電視機，卻又早已失去了我所喜歡看的電視台，買來做什麼．
人類真是自私．
自卑的人無聊又自私．
訂閱：
文章 (Atom)