29.10.05

係呀係呀外星人說:我很想回到地球!

<一/係呀>
係呀
唔知幾時開始
我就已經唔屬於地球

被外星人捉去既頭幾個月
我仲可以談談情,說說笑
但係過左無耐
我開始連自己既語言都唔係咁記得

係呀係呀星只有一種語言
叫做<係呀>

〔係呀?〕
〔係呀!〕

〔係呀?〕
〔係呀係呀!〕

係呀
<係呀>好快就可以學識
學識左之後
就可以正式成為係呀係呀星既公民
在當地生活

成為係呀係呀星人之後
一直都無乜問題
同地球人溝通
都唔使問叮噹借翻譯麵包
而且好多時候
仲好方便

〔食飯呀?〕
〔係呀!〕
〔一個人?〕
〔係呀!〕
〔咁慘呀!〕
〔係呀!〕
〔無約人咩?〕
〔係呀!〕
〔你又唔約我?〕
〔係呀!〕
〔你真係仆街!〕
〔係呀!〕



<二/習慣係呀>
係呀!由細到大
我都好怕陌生人
怕同陌生人講野
但係自從習慣左<係呀>之後
同陌生人講野都變得毫無難度
逐漸明白王菲點解只愛陌生人
係呀!因為<係呀>

我所講既陌生人
當然唔係完全陌生既人
而係剛剛認識
或者係以前識,見過幾面
什至係曾經熟過,依家已經完全唔熟既
都叫做陌生人

最怕既情況係
被迫同陌生人同處一個地方一段時間
因為就算你唔講野
人地都會同你講
諗番起之前唔識<係呀>
都覺得自己好羞家
呢!依家就完全唔同哂
係呀係呀咁
滔滔不絕



<三/係呀!又係我老姐要結婚>
老姐結婚當晚
雖然我自己無統計過
不過就算唔計
都知道自己全晚大部份時間
係用緊<係呀>黎講野

〔你就係阿邊個個仔啦?好大個啦喎依家!〕〔係呀!〕
〔同你家姐真係似樣啦!〕〔係呀!〕
〔好快到你啦喎!〕〔係呀係呀!〕
〔女朋友仔無黎呀?〕〔係呀!〕
〔唔得閒呀?〕〔係呀係呀!〕
〔你家姐今晚好靚喎!〕〔...係呀!〕

其中
大部人問我做緊乜野
當我答完失緊業既時候
就會出現以下對話

〔未搵到野做呀?〕〔係呀!〕
〔唔緊要呀,好快有架啦!〕〔係呀!〕

究竟呢段對話出現左幾多次呢
我真係數唔到

有一次唔記得邊個問我做緊乜
我答佢〔我依家做gym!〕

〔做gym好呀,身體又健康!〕
〔...係呀!〕

你話
我唔識<係呀>既話
點可以生存落去



<四/第一支煙>
當食完乳豬拼盤之後
第二道菜又未上
姨丈出去大堂煲煙
我緊係跟出去
美其名可以換黎一句有姨丈心
但實情係坐主家席真係悶到我要玩手指

我比左支打令送既日本版萬事發姨丈
佢遞左支國內引進版既萬寶路比我
用酒店既火柴點著之後
姨丈問我依家做緊乜

〔依家...失緊業.〕
〔幾耐啦?〕
〔兩個幾月.〕
〔之前做緊乜野?〕
〔副導演.〕

總覺得
呢個稱呼比PA好好多

〔未搵到野做?〕
〔係呀!〕

我終於用到<係呀>
令我對於緊張既對答鬆左一口氣
但係姨丈無啦啦開始打電話

...好在無人聽

原來佢打左去問以前在TVB做果D大叔
仲有無在TVB做
想搵個位比我入去
但係佢似乎唔係好知道道具大叔
同副導演做既野真係有小小分別

我見到咁
都唔好話唔感動
所以我講左比佢聽
我其實係無搵工,唔係搵唔到工

點知換黎既係屎窟開花
比姨丈屌到我標哂血
佢屌我唔生性,屌我重似個細路仔
屌我唔考順,屌我唔為自己打算
總之屌到我聽朝一定會賴屎果隻

好在我無講
更其實既係我有工唔想番...

番到去坐低
我諗起呢一日見咁多人
有長輩,有晚輩
我都係咁答佢地
但係只得姨丈一個屌我
諗真D真係幾好笑
點解我在係呀係呀星咁耐都未撞見過佢地

多謝我姨丈
多謝陳曉東唱左首咁好聽既<愛你打你>
苦口良藥,忠言逆耳
用一支日版萬事發換支大陸水煙
估唔到抵到爛



<五/第二支煙>
去廁所途中撞到表侄仔
於是一齊在廁所煲支快煙
要快既原因係
下一道菜好似係有鮑魚
表侄仔話我CHEAP
我好認真咁話佢聽
我呢D只係鍾意電影
鍾意許冠文做既小人物角色

我呢個表侄仔真係幾靚仔,又高大
當然,呢種高大靚仔係用我既標準黎界定
而我既標準應該同欣兒界定靚女肥瘦既標準無乜分別
肥過佢既叫做肥,瘦過佢既叫做瘦
自己就係一個普通樣貌女性既Standard〔可能應該係索既代表都話唔定〕
如果唔係,好難想像佢可以生存咁耐都咁有自信

所以話
如果開拍足球小將真人版
我希望可以應徵小志強一角
你睇
德仔真係常伴我左右,長存心中

講番我表侄仔
眼見佢腳踏 Underground
就估到佢有幾Punk
都估到如果我要搵佢
落旺角實無走雞

之後我問左佢一個問題
換黎一句〔仆街啦你!〕既答覆
乜依家d年青人咁同長輩講野架咩
睇住你由豆釘咁細粒變到依家高過我
無功都有勞啦
不過話分兩頭
佢又講得幾中肯
我幾時都覺得自己係一個仆街

我問佢有無考慮穿唇環
如果有既話
穿左之後可唔可以飲水比我睇
聽講會滴水
但係我未睇過,好想睇

佢無情咁拒絕左我
即係代表真係有呢個打算
所以我比多個提議佢

〔穿左之後可以試下飲一啖可樂,再加一粒萬樂珠!〕
〔會點?〕
〔記得大力合埋個口,咁d可樂就會在你個唇環個洞度射出黎,
 好勁!我在網上見人玩過,不過人地用可樂樽,唔係用口.
 用口應該勁好多,好好玩!〕
〔仆街啦你!〕

算啦!
後生仔又點會明我呢d老爺覺得好玩既事

關於Punk
我同表侄仔開始講Punk

我話Punk係反傳統,反建制
Punk係年青既反叛
Punk係The Sex Pistols
Punk同政治唔可以分開
Punk係精神同行為上既一種革命

佢話覺得Punk好型
係Punk就要著Underground
Punk頭好難Gel
窄身褲幾難著

我話Punk由對外在既不滿
之後發展為對心靈自省既Post-Punk

佢話睇中左條Vivienne Westwood既皮褲
依家儲緊錢買

今次仆街
好大條Gap

〔識左你講果d野有乜用?〕

係喎,有乜用呢?
諗左好耐都真係諗唔到有乜用

〔可以扮勁用黎溝女.〕
〔得咩?〕
〔得,我試過,真係work.〕

最後我又比左個提議佢
叫佢用把老牛去Westwood
界爛佢鍾意果條皮褲
直到滿意為止
之後掉低錢著住走
最緊要留低封信比Westwood
寫句〔You are not PUNK at all now.〕
咁就真係變為一個punk仔

〔莫等閒、白了少年頭,空悲切!〕

由廁所返去酒席途中
我好似我d長輩咁問左表侄仔一個問題

〔你依家做緊乜野?〕
〔關你撚事咩!哈哈哈!〕

好Punk,我都想.

唔比面我係你表叔
都比面大家都係雙失好喎

我出黎做左一年野
講真都無乜等閒過
但早就好似已經白了少年頭
表侄仔未出黎做野
早就唔係青頭
但係我見到佢個頭只係得番綠色
係我悲d?
定係佢悲d?
我真係唔識分



〔係呀係呀大王,我好想番去地球!〕
〔咁你去死吧啦.〕

24.10.05

我老姐要結婚之<東哥,你老媽是坐在主家席上的大嬸>


〔和你東哥一樣學人抽起煙來了?〕
〔哦,我是工作需要而已.〕
〔是在扮型追女仔嗎?〕
〔不是的,在女仔面前我會抽少一點,我認識的女孩大多都不抽煙.〕
〔現在有拍拖嗎?不知你快結婚還是你那東哥快!〕
〔我想是東哥吧!他年齡比我大,而且我很久也沒有拍拖了.〕
〔你東哥也很久沒有拍拖了.〕
〔對了,東哥現在怎樣了?〕
〔他平常在我的店舖幫幫忙,又沒有什麼做,就是不去追女仔!〕
〔可能他不用吧!〕
〔對呀!他對我說有很多女孩來找他,你東哥說很恐怖.〕
〔真的嗎?我就沒有這福份,找我都是男的.〕
〔他說就是看不上眼,這麼多一個也沒有.〕
〔不用擔心啦!東哥跟叔叔一樣高大有型,跟嬸嬸你一樣聰明又會說話,一定會找個好女孩回來的.〕
〔我又沒有擔心,這麼多女孩找他,就是怕他會太花心!〕
〔說的也是.對了嬸嬸,你的魚翅吃完了,要不要多一碗.〕
〔不用啦,你堂妹的老公就經常買回來在家一起吃.〕
〔反正我要出去幫手了,婆婆他們也吃不下,嬸嬸你就代我吃吧!那我出去幫兄弟手了.〕

〔侍應!〕
〔係,有什麼可以幫忙?〕
〔幫我把最後一碗翅倒給樣子最想吃的那個大嬸.〕
〔是的.〕


X X X X X X X X X X X X X X X X X X X X X X X X X X X X X X X X X X X


親愛的東哥:

你好嗎?首先讓我說句對不起,因為我把你的樣子和名字都忘記了,我們也太久沒有見面吧!

聽嬸嬸說,你好像有很多女孩找你呢!我勸你還是快點找定一個好了,嬸嬸她好像很擔心你會玩女人似的,可能因為你是叔叔的兒子吧!我媽就從沒擔心我了,因為他兩老子一直也相處得很好.

其實今次寫信給你,是有一件認真的事和你相討的.要是我將來要結婚了,可以不邀請嬸嬸嗎?因為我實在有點害怕,我結婚時嬸嬸也應該很老了,這樣舟車勞動確實對老人家不太好啊!

另外,雖然不是什麼一件值得炫耀的事,但我的忍耐力確實比自己想像中好呢!要不是見到嬸嬸,我也不會發現.請代我向嬸嬸好好道謝!另外一件事,是我要向嬸嬸說聲不好意思的.就是我姐姐結婚那天,我在心中代她向姐姐和姐夫以及我們整個家族道了歉.我想嬸嬸她大人有大量,不會怪我搶先一步的吧!無論嬸嬸那天如何大呼小叫,在剪掉的DV帶中也見不到嬸嬸的影子,為此我也要陪個不是.要是再有機會,我必定會對攝影師要求以嬸嬸為主角優先拍攝呢!最後,請代我向嬸嬸問好.因為那天見她吃東西很急的樣子.能代我叮囑她不要吃那麼多魚翅好嗎?膽固醇很高的.

對了,南妹好嗎?她的嬰孩好嗎?聽嬸嬸說嬰孩的樣子跟南妹很相似,十分可愛,實在替南妹高興!但是在有意無意間聽嬸嬸說南妹和嬸嬸也相似,由於我把南妹的名字和樣子也忘記了,倒令我多了一點憂心.我回家後用中華字典把<可愛>這個詞組查一查,發覺和我認知的沒有大分別.可能是時代變了,可愛的定義也一直跟著改變也說不定.

其實那天我一直有個問題想問嬸嬸,最後卻忘記問了.因為我見到嬸嬸的肚子好像很漲似的,是不是有了孩子呢?要是真的話就太好了,我可以成為堂哥了.如果大哥是東,二妹是南,第三個孩子一定以西為名吧!對不對?那麼,可以讓我替他改一個乳名嗎?我想了很久,還是覺得這個最好,最有意思!<秋花西>,東哥覺得怎樣?很有意思,又很詩意的名字呀!因為是第三個孩子,所以除了西字之外,也想用別的字代表第三這個意思,而且我很喜歡秋天,所以就用用了秋這個字了.而秋天的花中,最出名就是秋海棠了.所謂海棠春睡,通常就有讚美美人的意思在內.我想嬸嬸的孩子,一定是一個美人胚子的!而海棠的棠字,又能代表這名字是我這個好堂哥送的.你說是不是很有意思?秋花西,秋花西,好一個嬸嬸生的秋花西!

東哥,我很久沒有寫信了,可能有些句子未能表達我心中完全的想法,希望你不要介意.最後我真的要感激嬸嬸,是她令我發現很多平常不知道的事.是嬸嬸令我重新欣賞自己的父母,作為他們的兒子,令我感到驕傲.是嬸嬸令我知道自己是十分愛護姐姐的,在她的好日子中,對於那些無事幹攪破壞的人,我感到憤怒.是嬸嬸令我知道自己是尊重叔叔,東哥和愛惜南妹的,要不然,我不知那天會說些什麼.是嬸嬸令我知道自己是多麼小器的,我一定會好好改善!

好了,就說到這裡,結婚的話記得邀請我呀!我一定一定會來的!


你的好堂弟上

我老姐要結婚之<在結子面前,別叫我表叔公>

那晚在酒店中
大部份時間都係幫老媽同佢d朋友影相
真係...

突然間
我聽到一把異常動聽的聲音
當我回過頭時
在我旁邊
就發現一位二十來歲
紮著高辮子的少女和朋友聊天
(不知何時開始,就覺得紮高辮的女孩子感覺不錯)

就在我出了神時
我那天真活潑的表姪孫仔拉著我的西裝尾
<表叔公,我要去柯尿!>
幾時都話,細路仔係無辜的
而且只係一個四歲既細路仔
我只可以雙手meet住佢塊面
細聲同佢講:今日...叫我哥哥!
<表叔公哥哥,我就賴啦!>
就在同時,我聽見笑聲
我見到竹內結子
一個竹內結子式的笑容
我唯有拉著表姪孫仔快步行去廁所
因為我發現
我竟然,好似,有d面紅

在送客時
我再次見到她
我把手僵硬的伸了出來
...連自己都覺得非常突兀
明明人地都行過了
仲伸隻手出黎做乜...
結子遲疑了一會(...我唔知佢個名,唯有咁叫)
最後她笑著跟我握了手
我們大約牽了手兩秒,上下搖了三次左右
我的天...
又係果個竹內結子式的笑容
攪到我九唔搭八咁講野
<恭喜哂!拜拜!>
我老姐結婚,恭喜人d乜...
好在無順口講多句得閒黎過
然後看見排在她身後那位女性朋友
和她耳語了一會後又笑了起來
我覺得,我應該找個地方躲起來...

幾時都話
要小心光頭佬
特別係光頭肥佬
即係我姐夫從英國回來既大哥
送完客後
他突然在他老婆身旁伸出手來握手
而且忍住笑咁講句<恭喜哂!拜拜!>
然後同佢老婆一起回頭望住我笑
我先至知道
天下間既笑容原來有咁大分別
從未見過人對我笑得咁仆街

要是那時有下雨的話
不知道有沒有勇氣說出這樣的對白

小姐你好
我覺得你很面熟
特別是笑起來的時候
請不要誤會
我不是那種不經大腦
就說別人很面熟來認識女孩子的人
只是我真的覺得你很面熟而已
好像在哪裡見過似的
對了!是在電視上
你笑起來的時候
真的很像日本電視劇中的那個<竹內結子>
真的是一樣的好看
其實我只是想告訴你這個而已
不過碰巧今天陽光燦爛
又下著微微細雨
不知我可不可以
藉著雨點對你說多句話?

我老姐要結婚之<教堂中的O Ne Chan>

<教堂中的O Ne Chan x 一秒感動>



第一次坐在第一排觀禮
感覺好特別
好似好關我事,但其實又唔係好關我事
只係因為結婚果個係我老姐
而我又係佢老弟
只係因為咁,我坐了第一排
老爸老媽一路在旁係咁流馬尿
我都唔知點算好

但係講真,當[登!登!登登!]響起(唔係第九交響樂...)
老爸拖住老姐慢慢行入黎
姐夫接過老姐的手的一剎
我確實有一點點的感動
好像有很利害的事情在發生似的
真想大叫一句
[嗚哇!!哦呢盞,樹該兒!!!!]


在教堂上的婚禮
我認為是最好的
一切都來得簡單而莊嚴,神聖,隆重
沒有把婚姻這兩個字流於表面化



<婚盟>

我要結婚了
所以把你們全都請來
一排排的坐好
看著我迎娶我最愛的人

你們要為我們作證
在這個日子
在這個教堂
在你們面前
我在讀著的誓言

你們要豪無保留的,真心真意的
為我們送上最美好的祝福
愛情是兩個人的化合物
是婚姻把它實體化
呈現在你們面前
一同分享我們的喜悅

我從她爸爸手中接過她
為她說出羞於啟齒的話
在你們面前
起山高的盟,海深的誓
為這段婚姻
以天地為鑑,親朋為證
我愛我的妻子,比自己要多
我的生命,不再屬於自己一人

我知道
在步出教堂的時候
天使正為我們歌唱
在天空灑下雨點給陽光照射
畫出一道七色彩虹
因為就在這天
我把其中一位天使迎娶下來
依賴的,緊握著我的手
我知道
我要永遠的把她守護

陽光會為我們祝福
雨水會為我們滋潤
彩虹會為我們訓示
我們愛對方,比自己要多
我們的生命,不再屬於自己一人

我老姐要結婚之<我找了這對Converse很久>

千年絲蘿喜有託
百年琴瑟喜和諧

2005年10月22日
我老姐正式下嫁我姐夫
我係女家家屬
又係男家兄弟



<Start From Converse>

早上六時正
準時起床
其實沒有睡
才可以這樣...

洗過澡後
原來全家已起床
所以我把握機會聽聽歌
老姐說想要輕鬆一點的音樂
唯有把譚詠麟的寶麗金88極品音色系列
(還以為她會喜歡,還特地點了 相識非偶然 給她)
轉為Los Indios Tabajaras的Always In My Heart

隨著紅番結他的音樂響起
我跟著節拍把西裝穿上
結上那條姣到仆街既tie
Gel好頭後
已經過了45分鐘
慢了一點...
可能因為音樂的關係
我不自禁扮起偉仔
差在沒有點起煙放在煙灰缸
實在令人發笑

把我喜愛的火機注入電油後
拿起打令送的日本萬事發
(不知為何,我想在這天抽這包煙)
就踏上Converse出門了



<十兄弟>

十位兄弟,一個契弟
估唔估到係邊個
無錯,就係我
十位之中,一半唔識
三個曾經熟過
一個係我中學同班女同學既大佬
(又係我姐夫個表妹既男朋友...世界真係細)
剩下一個廿四歲同佢地相距一條Generation Gap既我

所謂兄弟
就係著西裝既苦力,保鑣,保母,垃圾佬,司機,陪酒漢,
針板上的三文魚,人型發聲石柱等等既
多功能合一有血有肉智慧型男子漢組合
所以話,唔係兄弟,就真係唔好做兄弟



<七姊妹>

女性來說,廿七八歲左右是最能散發出迷人氣息的時間
怎麼說才好呢
我只想把這句說話從口中大口大口的回收
也只好這樣子了
真令人洩氣...

17.10.05

千言.萬語

這麼久沒有來這裡
回歸的第一篇真的不知如何去寫
唯有憑歌寄意
祝大家身體健康

(P.S. 送上近照一張)



千言萬語
詞:爾英 曲:古月 唱:鄧麗君

不知道為了什麼
憂愁它圍繞著我
我每天都在祈禱
快趕走愛的寂寞

那天起 你對我說
永遠的你愛著我
千言和萬語
隨浮雲掠過

不知道為了什麼
憂愁它圍繞著我
我每天都在祈禱
快趕走愛的寂寞