要終止一段寬頻，比終止一段感情，來得太容易，太快，太急，太不實在。
十多年前開始，我就在網上行生活。直到現在這一刻，我都是依靠它來和大家談天。一個月後，我會身處香港寬頻，雖然，那是絕對不能代表香港的寬頻。
就像「香港台」一樣。
說遠了，我真的不想說這些。但腦袋裡總會反射性地，把所有的事情和工作上聯繫起來，再繞小道嘲諷，俗稱「抽水」。
我討厭這樣下去，那些事情與我無關。我的私生活不要再被工作的旁枝侵食，包括思想與行為上。
真的說遠了。
為了查證一個網上行的帳戶號碼，我把備份郵件全部重新看一次，包括雅虎，MSN及Gmail等。我找不到那個帳戶號碼，但重現了一段段已被淡忘的過去。
我的感情生活，怎。麼。了？
自私如我，也被好幾人傷害過。平容如我，原來也傷害過不少人。
最需要感情歷練的十年，已正式告終。
看著這個sent box裡的郵件，單純又熱情的文字，我懷疑從前的我是叫別人來代覆電郵。
一封接一封的信，一根接一根的煙。
都是因為那句他媽的「我要專心工作」。
唉。
對了，忘了說。其實我是嘆氣小組裡的永遠榮譽會員，事無大小，長嗟短嘆，正常不過。
原來我由八月開始就無再寫過野 --- 其實之前都越黎越少寫，睇怕我唔再寫野既話，個人就同呢個世界越黎越同化。或者咁樣係一件好事，太自我最後都係會仆街死。我見好多人封blog，又重開，又封又再開，有d就真係封左，我諗會寫既始終都會寫落去，唔寫既就真係唔會再寫既。
咁耐無見，你睇，其實我無乜點變 --- 講既野都係咁廢。
不過經過呢三個幾月既沉默，我發覺自己最大既改變，竟然會係EQ，Emotional Intelligence，情緒智商。
好似高左d，不過我寧願個人高d。
我唔明點解情緒都要有智商，都唔係好分得出情緒智商高d既開心，係唔係會比情緒智商低既開心，更加開心或者無咁開心。
我一直認為，EQ，係同「西」字掛鉤。即係越西既人，EQ多數就越高。但係EQ高，又唔等於你個人西既。
最多咪比人話個人假d咁囖。
頭先夜媽媽落去樓下南記食牛腩河，比我見到一個人，一個我唔識既人。但係佢好用力咁揸住碌Q棍，講緊電話。令到我無辦法唔留意佢既存在，同令我有再寫野既衝動。
Q棍，唔係用黎鬧人既，即係我唔會無啦啦鬧你「乜你咁Q棍架，仆街！」No！完全唔make sense！Q棍，係要黎篤。波。既。
以我飲住杯凍奶茶少甜既推測，佢，係同緊女朋友講電話，而且鬧緊交。佢應該比女朋友知道左，夜媽媽走左去篤波。因為，個男人講左句好man既對白。
「我去出去篤波姐，又唔係去揸波，發咩癲呀又！」
重點黎啦。
篤波係重點？唔係。揸波係重點？都唔係。發癲係重點啦掛？對唔字，發癲係人都會，睇下你幾時發既姐。
重點，係個「又」字。
又，即係有「重複」既意思。又，即係有「重複」既意思。「你好似講多左次。」
「係咩？咁我黎過個。三，二，做。」
又，即係有「重複」既意思。又，即係有「重複」既意思。拿，你依家係時候話我：「你又講多左次啦！仆街！」
「係咩？咁對唔字囖。」
好明顯，男事主唔係第一次出去揸波，女事主都唔係第一次發癲。換言之，佢地為左出去揸波同發癲，鬧過唔只一次交。
都鬧過咁多次，仲鬧乜Q交呢？聰明既你一定會知道我下句講乜。
「無錯，係你啦，係你啦！仲唔快d企起身同屋企人朋友打個招呼？」
你估中左，無錯，就係鬧EQ交。
「EQ交」唔同我地細個勞作堂用既OK膠，或者比較出名AA膠。呢兩種膠真係膠，個目的係張兩樣野攪番埋一齊。但係EQ交就唔同，EQ交係令人分開既主要原因之一。
咁乜野為之EQ交呢？各位可以睇睇powerpoint上既對白圖表。
「。。。。。。」「。。。。。。」
「。。。。。。」「。。。。。。」
「做咩唔出聲呀？」「咩唔出聲呀，你自己唔出聲JA！」
「我唔出聲？好似依家係我出聲，問你做咩唔出聲先架wor！」「咁你出聲之前咪唔出聲law，唔係點出聲呀。」
「你都打橫黎講。」「我不嬲都打橫黎講架啦，我唔覺得你追我之前我係打直黎講law。」
「你想點呀？」「咩又我想點呀，次次我嬲都剩係識問我想點，你想點就真啦。」
「咩我想點呀，我咪想知你想點law！」
大部份既EQ交既情侶，都係差唔多，大同少異，絕對無內容，講黎講去三幅屁，純考你EQ。Loop到最後，一係就其中一個頂唔順，訓先。一係就其中一個頂唔順，分手。
眼見身邊既朋友，不分男女，鬧EQ交最多既，多數都係得一種，就係平時唔會點鬧交，但係到左某個要爆既moment時，EQ交出現既次數，就會比平時乜都鬧下交既，以幾何級數增加。
古人睿哲，大禹治水。
可能我搭得太多小巴，望得太多小巴司機掛住既字畫，「忍」字。
可能我誤會左，以為越忍得多就係一種美得，EQ就越高。但係，細心推敲，小巴司機忍得最多既，睇怕都係忍屎同忍尿。原來我一直誤會左幅字畫既功用。
望住個男人緊握住支Q棍，每隔幾分鐘先向個電話講幾句野，我突然間，有一種新既頓悟。
「喂，聖誕快樂。」
「嗯，聖誕快樂。」
不是我的EQ高了，而是我的EQ膠了。
「Resident Evil : Degeneration 生化危機 - 惡化」
