＜一／係呀＞係呀
唔知幾時開始
我就已經唔屬於地球
被外星人捉去既頭幾個月
我仲可以談談情，說說笑
但係過左無耐
我開始連自己既語言都唔係咁記得
係呀係呀星只有一種語言
叫做＜係呀＞
〔係呀？〕
〔係呀！〕
〔係呀？〕
〔係呀係呀！〕
係呀
＜係呀＞好快就可以學識
學識左之後
就可以正式成為係呀係呀星既公民
在當地生活
成為係呀係呀星人之後
一直都無乜問題
同地球人溝通
都唔使問叮噹借翻譯麵包
而且好多時候
仲好方便
〔食飯呀？〕
〔係呀！〕
〔一個人？〕
〔係呀！〕
〔咁慘呀！〕
〔係呀！〕
〔無約人咩？〕
〔係呀！〕
〔你又唔約我？〕
〔係呀！〕
〔你真係仆街！〕
〔係呀！〕
＜二／習慣係呀＞
係呀！由細到大
我都好怕陌生人
怕同陌生人講野
但係自從習慣左＜係呀＞之後
同陌生人講野都變得毫無難度
逐漸明白王菲點解只愛陌生人
係呀！因為＜係呀＞
我所講既陌生人
當然唔係完全陌生既人
而係剛剛認識
或者係以前識，見過幾面
什至係曾經熟過，依家已經完全唔熟既
都叫做陌生人
最怕既情況係
被迫同陌生人同處一個地方一段時間
因為就算你唔講野
人地都會同你講
諗番起之前唔識＜係呀＞
都覺得自己好羞家
呢！依家就完全唔同哂
係呀係呀咁
滔滔不絕
＜三／係呀！又係我老姐要結婚＞
老姐結婚當晚
雖然我自己無統計過
不過就算唔計
都知道自己全晚大部份時間
係用緊＜係呀＞黎講野
〔你就係阿邊個個仔啦？好大個啦喎依家！〕〔係呀！〕
〔同你家姐真係似樣啦！〕〔係呀！〕
〔好快到你啦喎！〕〔係呀係呀！〕
〔女朋友仔無黎呀？〕〔係呀！〕
〔唔得閒呀？〕〔係呀係呀！〕
〔你家姐今晚好靚喎！〕〔．．．係呀！〕
其中
大部人問我做緊乜野
當我答完失緊業既時候
就會出現以下對話
〔未搵到野做呀？〕〔係呀！〕
〔唔緊要呀，好快有架啦！〕〔係呀！〕
究竟呢段對話出現左幾多次呢
我真係數唔到
有一次唔記得邊個問我做緊乜
我答佢〔我依家做ｇｙｍ！〕
〔做ｇｙｍ好呀，身體又健康！〕
〔．．．係呀！〕
你話
我唔識＜係呀＞既話
點可以生存落去
＜四／第一支煙＞
當食完乳豬拼盤之後
第二道菜又未上
姨丈出去大堂煲煙
我緊係跟出去
美其名可以換黎一句有姨丈心
但實情係坐主家席真係悶到我要玩手指
我比左支打令送既日本版萬事發姨丈
佢遞左支國內引進版既萬寶路比我
用酒店既火柴點著之後
姨丈問我依家做緊乜
〔依家．．．失緊業．〕
〔幾耐啦？〕
〔兩個幾月．〕
〔之前做緊乜野？〕
〔副導演．〕
總覺得
呢個稱呼比ＰＡ好好多
〔未搵到野做？〕
〔係呀！〕
我終於用到＜係呀＞
令我對於緊張既對答鬆左一口氣
但係姨丈無啦啦開始打電話
．．．好在無人聽
原來佢打左去問以前在ＴＶＢ做果Ｄ大叔
仲有無在ＴＶＢ做
想搵個位比我入去
但係佢似乎唔係好知道道具大叔
同副導演做既野真係有小小分別
我見到咁
都唔好話唔感動
所以我講左比佢聽
我其實係無搵工，唔係搵唔到工
點知換黎既係屎窟開花
比姨丈屌到我標哂血
佢屌我唔生性，屌我重似個細路仔
屌我唔考順，屌我唔為自己打算
總之屌到我聽朝一定會賴屎果隻
好在我無講
更其實既係我有工唔想番．．．
番到去坐低
我諗起呢一日見咁多人
有長輩，有晚輩
我都係咁答佢地
但係只得姨丈一個屌我
諗真Ｄ真係幾好笑
點解我在係呀係呀星咁耐都未撞見過佢地
多謝我姨丈
多謝陳曉東唱左首咁好聽既＜愛你打你＞
苦口良藥，忠言逆耳
用一支日版萬事發換支大陸水煙
估唔到抵到爛
＜五／第二支煙＞
去廁所途中撞到表侄仔
於是一齊在廁所煲支快煙
要快既原因係
下一道菜好似係有鮑魚
表侄仔話我ＣＨＥＡＰ
我好認真咁話佢聽
我呢Ｄ只係鍾意電影
鍾意許冠文做既小人物角色
我呢個表侄仔真係幾靚仔，又高大
當然，呢種高大靚仔係用我既標準黎界定
而我既標準應該同欣兒界定靚女肥瘦既標準無乜分別
肥過佢既叫做肥，瘦過佢既叫做瘦
自己就係一個普通樣貌女性既Ｓｔａｎｄａｒｄ〔可能應該係索既代表都話唔定〕
如果唔係，好難想像佢可以生存咁耐都咁有自信
所以話
如果開拍足球小將真人版
我希望可以應徵小志強一角
你睇
德仔真係常伴我左右，長存心中
講番我表侄仔
眼見佢腳踏 Ｕｎｄｅｒｇｒｏｕｎｄ
就估到佢有幾Ｐｕｎｋ
都估到如果我要搵佢
落旺角實無走雞
之後我問左佢一個問題
換黎一句〔仆街啦你！〕既答覆
乜依家ｄ年青人咁同長輩講野架咩
睇住你由豆釘咁細粒變到依家高過我
無功都有勞啦
不過話分兩頭
佢又講得幾中肯
我幾時都覺得自己係一個仆街
我問佢有無考慮穿唇環
如果有既話
穿左之後可唔可以飲水比我睇
聽講會滴水
但係我未睇過，好想睇
佢無情咁拒絕左我
即係代表真係有呢個打算
所以我比多個提議佢
〔穿左之後可以試下飲一啖可樂，再加一粒萬樂珠！〕
〔會點？〕
〔記得大力合埋個口，咁ｄ可樂就會在你個唇環個洞度射出黎，
好勁！我在網上見人玩過，不過人地用可樂樽，唔係用口．
用口應該勁好多，好好玩！〕
〔仆街啦你！〕
算啦！
後生仔又點會明我呢ｄ老爺覺得好玩既事
關於Ｐｕｎｋ
我同表侄仔開始講Ｐｕｎｋ
我話Ｐｕｎｋ係反傳統，反建制
Ｐｕｎｋ係年青既反叛
Ｐｕｎｋ係Ｔｈｅ Ｓｅｘ Ｐｉｓｔｏｌｓ
Ｐｕｎｋ同政治唔可以分開
Ｐｕｎｋ係精神同行為上既一種革命
佢話覺得Ｐｕｎｋ好型
係Ｐｕｎｋ就要著Ｕｎｄｅｒｇｒｏｕｎｄ
Ｐｕｎｋ頭好難Ｇｅｌ
窄身褲幾難著
我話Ｐｕｎｋ由對外在既不滿
之後發展為對心靈自省既Ｐｏｓｔ－Ｐｕｎｋ
佢話睇中左條Ｖｉｖｉｅｎｎｅ Ｗｅｓｔｗｏｏｄ既皮褲
依家儲緊錢買
今次仆街
好大條Ｇａｐ
〔識左你講果ｄ野有乜用？〕
係喎，有乜用呢？
諗左好耐都真係諗唔到有乜用
〔可以扮勁用黎溝女．〕
〔得咩？〕
〔得，我試過，真係ｗｏｒｋ．〕
最後我又比左個提議佢
叫佢用把老牛去Ｗｅｓｔｗｏｏｄ
界爛佢鍾意果條皮褲
直到滿意為止
之後掉低錢著住走
最緊要留低封信比Ｗｅｓｔｗｏｏｄ
寫句〔Ｙｏｕ ａｒｅ ｎｏｔ ＰＵＮＫ ａｔ ａｌｌ ｎｏｗ．〕
咁就真係變為一個ｐｕｎｋ仔
〔莫等閒、白了少年頭，空悲切！〕
由廁所返去酒席途中
我好似我ｄ長輩咁問左表侄仔一個問題
〔你依家做緊乜野？〕
〔關你撚事咩！哈哈哈！〕
好Ｐｕｎｋ，我都想．
唔比面我係你表叔
都比面大家都係雙失好喎
我出黎做左一年野
講真都無乜等閒過
但早就好似已經白了少年頭
表侄仔未出黎做野
早就唔係青頭
但係我見到佢個頭只係得番綠色
係我悲ｄ？
定係佢悲ｄ？
我真係唔識分
〔係呀係呀大王，我好想番去地球！〕
〔咁你去死吧啦．〕
